ماشربتش من نيلها

يا ليلي

.....

ويا له من ليل

lion king

في طفل هو اكتر طفل بحبه في العيلة اسمه عبد الله ، هو ابن خالتو، عمره 8 سنين . امبارح قررت انا وهو نتفرج على فيلم على الكمبيوتر، طبعا لازم اختارله فيلم لذيذ وبيقول حاجة كويسة عشان انتوا عارفين التربية والحجات دي ، المهم اخترت فيلم(روب-ب-هود) بتاع جاكي شان وقعدنا نتفرج . قبل نهاية الفيلم بشوية كان في مشهد مؤثر قوي، النونو الصغنون اتحط في فريزر كبير ( حوار تبع الفيلم يعني)، المهم جاكي شان هو وصاحبه عملو المستحيل عشان ينقذوه، انتو عارفين طبعًا ( هع..طاخ..طيخ)، انقذوه، بس النونو تقريبًا قلبه وقف لكن هم ما فقدوش الأمل وحاولوا انعاش قلبه بطريقة مؤثرة قوي، في اللحظات دي بصيت لعبد الله لقيته عايز يبكي وعنيه مليانه دموع رافضة تنزل خجلاً او كبريائه منعه مش عارفه بس هو ما بيرضاش يعملها ابدًا قدام حد، وفجأة راح قايلي بصوت مخنوق بيرتجف ( ما خلاص مات .. ما خلاص مات) . الصراحة انا قلبي وجعني عليه بس في نفس الوقت اتفاجأت، كل الي شغل بالي في اللحظة دي ان عبد الله صغير على انه يحس او يتأثر بموقف زي ده ، انا عارفة انه ذكي قوي وبيحب يعرف عن كل حاجة بتحصل حاوليه بس برضو اتفاجأت بجد و من امبارح عمالة افكر في تفسير لرد فعله بس مش عارفة ، ففكرت اسأله ليه دمعت امبارح واحنا بنتفرج على الفيلم
قالي : عشان النونو كان هيموت
قلتله : وايه يعني لما يموت
رد عليا : لا الموت وحش ولأن النونو حلو وحرام يموت
سكت ومردتش ارد عليه لأني عارفة ان الحياة كفيلة تثبتله ان كل حاجة حلوة لازم تموت

هل انت ميت؟! لكنك تسمع، تبصر، تاكل، تتحرك، تنجز ماعليك انجازه ،تضحك حتى لايلحظ من حولك موتك، تدمع عيناك حتى تجف، فيصبح قلبك فقط هو القادر على هذا الفعل دون توقف

عجبي عليك .. عجبي عليك يا زمن
يا بو البدع يا مبكي عيني دمًا
إزاي أنا أختار لروحي طريق
وأنا اللي داخل في الحياة مرغمًا
عجبي !!


نظرت في الملكوت كتير واشغلت
وبكل كلمة (ليه ؟) و (عشانيه) سألت
اسأل سؤال .. الرد يرجع سؤال
واخرج وحيرتي أشد مما دخلت
عجبي !!


على رجلى دم .. نظرت له ما احتملت
على ايدي دم .. سألت : ليه؟ لم وصلت
على كتفي دم وحتى على راسي دم
أنا كلى دم .. قتلت؟ .. والا اتقتلت؟
عجبي !!


يا حزين يا قمقم تحت بحر الضياع
حزين أنا زيك وإيه مستطاع
الحزن ما بقالوش جلال يا جدع
الحزن زي البرد .. زي الصداع
عجبي !!

lord of war

اضغط هنا

دايرة مشاعر



دايرة مشاعر...
مستحيل
داير كلامى ع الشطوط
زى انكسار الرفض
و التوهه
الدمع...
كفارة عَجَز
والليل مآب ...
من كحل عين الفجر ...
لابواب المغيب
اليوم طوفان .. فايت على ورد اتنسى
فوق الرصيف
والقطر عنوان الرحيل
وعيون بيملاها الوجع من بصة الشباك
خلاص ..
ولاّ خلاص
بتعد عمدان الطريق
وبتملا قلبك بالمسافات الطويلة
و السكات
والتوهه ف بلاد الخيال
الضحك مرر فوق جبينك


والدرب لبلادِك طوفان ..
ولاّ طواف
لو عدّى يوم زى الشجر ..
فارد شراعه ف الحفيف ..
ضارب قلوعه ف النسيم قد الهلال
برضى بغناوى الريح،
ورقص الورد،
واسراب السحاب...
لكن
مراكبك من زمن
راسيه ف مواويل الشتا
والبرد فوق شباكك المقفول
قديم
وأنا كل م احلم إن أنا ف حضنك
ألقانى ف نهاية الطريق...
ببكى



دلوقت بس البعد لون القطن ..
وبملمس حرير
ودفا الدموع

قلبك...
شجر عطشان
قلبى...
شجر ملّ الخريف

عبد اللطيف أحمد من ديوانه ( للبحر كلام متأجل