"حتى يتبين لكم"

يا نقطة سودة جوة قلبي بتنتشر
غطى السواد لون البيبان
بوش تراب المندرة
ونشع على جير الحيطان
مين اللي قال ان ( الصباح ممنوع يبان ) ؟
الصبح مات من ميت زمان
قبل الزمان
أنا ماوعاهوش
ماوعاش على غير شمس
تحرق جتتي ف عرض الغيطان
ولا عمرها تنور طريق
واوعى كمان
على ضربة الكرباج تشق النهر
من ضهري لحد الأرض
فتنبت حصاد غيري
الليل دخل من سكتين
وانت اللي قاعد تنتظر ما بين بينين
مستني إيه ؟
البيت فضي .... مشيوا الجيران
العرس داير من سنين ....... والناس هناك
والكوشة فيها اتنين غلط
لا بهية هي بهية بعد اللي حصل
ولا كان ياسين صاحب الفرح
سرق الفرح
صاحب الدهب والشمس
والكرباج وأرزاق العباد
قلبي المفتفت م العطش برة الحساب ؟!!!!!
غيطي اللي شقق م الحنين برة الحساب ؟!!!!
أمي اللي داسها القهر ليه برة الحساب ؟
والغربة ليه ؟
والغربة تتكرر بهدم
والفقر يتمرر بيتم
يا شاربين شربات فرح معجون بدم
يا بادئين إمتى المتم
أنا قلبي كان بذرة نهار
لكنه متقدر وتم
والنقطة سودة ف قلبي جوه بتنتشر
غطى السواد لون البيبان
بوش تراب المندرة
ونشع على جير الحيطان
شب وطلع فوق السطوح
بيمد إيده ويلتقي إيد السواد
اللي على سطوح
الجيران

ابراهيم سعيد